مدونة من الذاكرة © From-Memory

مدونة من الذاكرة © From-Memory
     عُـلبة ألــوان البطاقات  الرئيسية


  :: الصفحة الأولى ::
  
  عُـلبة ألــوان
  
  شمعـه مضيئــه
  
  كشكـول أيامي
  
  أحاديث نفـسـ
  
  لوحات ناطقة
  
  صـورة مقـلوبـة
  
  يوميات مدرس
  
  تـقـنـي
  
  البطاقات

 

::: بحث :::



::: حكمة :::

طعم المجاملة لذيذ، شرط ألآ تبتلعها


::: مواقع  :::

 

من الذكرة


::: راسلنا :::

الاسم :

البريد الإلكتروني :

موضوع الرسالة :

نص الرسالة :


::: إحصائية المدونة :::

 

  عدد الزيارات الكلية : 362271
   عدد المقالات المنشورة : 229
   عدد الأقسام المفتوحة :8


 
 

من الذاكرة

10/2/1427

دعوة لقراءة المقال

نسخة لطباعة المقال


انا واللموزين وظلموووه ياناااااس


انا واللموزين وظلموووه ياناااااس

في سنه من السنوات الماضيه .. ايام التكاسي الصفراء وتوها باديه تطلع
سيارات الاجرة ام خط برتقالي وبدا ينكب عليها الهنود والف وست ميه شركه
فتحت لانه ما كان فيه نظام .. المهم اني بجلاله قدري في ذاك الوقت كنت عربجي
بعيد عنكم بس تعرفون العرابجه زكرت يصيرون محترمين بس ياويلك تغلط ..

المهم انا بقول لكم السالفه باختصار ويمكن يكون بعضكم ساكن حول مكان الحدث
ويتذكر القصه بس لا يعلم انه انا تكفون ههههههههه السالفه ومافيها اني طالع
بالعن (السيارة) حقتنا طااااير في طريق الملك فهد في الخدمة ابي الحق على محل
ولازم ارجع بسرعه والا بينلعن خامسى .. المهم كان جنبي سيارة اللوموزين هذى
يوم قربنا عند البنك الامريكي الى قبل منفذ شارع موسى بن نصير الا ابو الشباب يلف
علي لان فيه سيارات تطلع في وجهه طيب انا وش دخلني ؟؟؟؟؟؟؟؟؟؟؟؟
افهم يعني يهدى المفروض يشوف له حل يصدمهم ليش يلف علي ؟ طبعا مافيه
سبب مقنع ولا وجيه يخليه يلف على المهم كل ماله يحذف شوي علي وكل هذا الكلام
في لحظات وحنا طايرين وانا ارص في الرصيف لين خلاص برقاه لو ما وخر عني
واتذكر حركه توني متعلمها من أخوي الى أكبر مني وهي اذا حدك احد سو هلتكتيك
وادقشه من الزاويه الخلفيه قلت بس ما بدهاااااش نطبق الخطة اربعه اربعه ثلاثه
هجوميه بحته .. والله واعطيه ذيك الدقشه الا هو زاحف بشكل ما تخيلته وغير كذا
هندي ما يدير الطاره بشي المهم زحف زحفه شينه عدل وجه يعني صار وجه السياره
حقته في وجهي ومازالت السيارة تزحف وانا قلبي يرجف وودي العن خامس اخوي
على ذى التوصيه المحقااااا بتجيب فينا العيد .. المهم شوي الا طخخخخخخخخخخ
دووووووووووووووف وغبااااااااااااار يتطاير طبعا مع الزحف ضرب في الرصيف
وطلعت سيارته فوق الرصيف وتضرب في احواض الزرع السداسيه وينقلب لو احد راح
في مكان الجريمه بيلقاها للحين موجوده الاحواض ماشالوها .. المهم ربي رحمني
انه مادخل على الطريق السريع والا كان علوم وحادث جماعي بيصير .. في وقتها
قمت افكر وش اسوي وش اسوي ؟ ياولد مالك الا تفرك وترجع بسيارة ثانيه
طبعا سالفه انه مات هذى لا ما مات لاني واقف اتفرج وطبعا فركت والسياره عندي
ماجاها شي لاني مطبق التعليمات بشكل صحيح لا بارك الله في تعليماتك يا خوي
الا طبعه البويه البرتقاليه جت على الجتب الايمن للسياره وامر محطه واشتري زيت
فرامل واجلس افرك فيها لا ينلعن خامس خامسي لاني بنكفش اني مسوي جريمه
وارجع واقول لخوي السالفه على بالي بيفزع لي الا لعن خامسي وخذاني ورحنا
لمكان الحادث لكن للاسف مالقينا احد طبعا انا ماعلمته الا بعدها بكم ساعه رجعنا
وقالي مات صار له شي ؟؟؟؟
قلت له لا والله ما مات ماجاه شي بس سيارته تعورت وانقلبت !!
قالي قلب الله راسك والله ان دري الوالد عنك ان يصلبك هنا لكن خلنا نشوف
وش يصير .. وجلست اترقب لمده اسبوعين يمكن يصير شي والا احد يصير
ماخذ رقم اللوحه او شي المهم ومشى الوقت ومشت الايام ماصار شي قلت بس
حلو كل شي على ما يرام ..

وتحدث الطاااااااااااااااااامه بعد مرور ست شهور من الجريمه .. الا البحث الجنائي
متصل على الوالد الو السلام عليكم وعليكم السلام
هذا منزل فلان الفلاني ؟
الوالد نعم من بغيت ؟
البحث: معاك البحث الجائي و لازم تمرنا في الادارة الفلانية التابعه للامن العام
قسم الحوادث.
الوالد ارتاع يحسب ان اخوي فيه شي لانه ماكان في البيت وانا وقتها طبعا ما
كنت في البيت في المدرسة لكن اقولكم نقلاً عن ماصار موثوقه (الوالده) انا
كيف عرفت اول ما رجعت من المدرسه لقيت الوالده سالتها وين الوالد ؟؟؟؟
قالت لي السالفه وقالت الله يستر لا يصير اخوك صاير له شي والا مسوي حادث
انا قلبي طاح في سروالي > طبعا الى على راسه بطحه يحسس عليها
جلست على اعصابي ومصبط وملبد مااااااا تكلمت ولا قلت لها شي ..

بعد ثلاث ساعات جاء الوالد
وانا مسوي نفسي مالي دخل بشي وهو داخل من باب الشارع وانا منحاش لغرفتي
بسوي نفسي نايم لا ينلعن خامسي المهم وهو من فتح الباب وهو ينادي فيني قلت
في نفسي انا نايم ما والله ارد اكييييييييييييييد هذى جريمتي انكفشت الحين وبروح
فيها الحين وش يفكني منه .. المهم دخل وقالهم ناااااادوه نادوه وجوني يقولون تعال
طبعا لازم اسوي نفسي برئ ومالي دخل ومظلوم وانا انزل مع الدرج مسوي نفسي
فيني النوم ومالي خلق وهو يطالع فيني بنص عين وانا مسوي نفسي اطالع في الارض
مابي احط عيني بعينه قالي طالعني طالعته ابتسم قالي تغديت ؟ قلت لا قالي يله تعال
انتغدى سوى قلت طيب وجلست اتغدى معاه وكل لقمه ماااااش ماتبي تنزل مالي نفس
بقووووووووووة ابي اخلص واعرف وش السالفه ولا اقدر اساله اتورط .. شوي وهو
ياكل قالي وانا ابوك وش انت مسوي ؟
قلت وشو ماسويت شي !!
قالي متاكد ؟
قلت ايييييييييه ماسويت شي تعرفني انت وش اسوي ؟
قالي طيب تذكر وانا ابوك يمكنك مسوي شي وناسي؟
قلت لا لا اعرف ماسويت شي ابد وش طبعا وانا في نفسي اقول بس انكفشت
سكت وكمل اكله شوي ثم قالي الحين يالهيس الاربد يوم انك تصدم المسيكين
وتنحاش ليش ما علمتني ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
قلت هاه وشو ماصدمت احد ؟>> قوة جحيد فيها فرش بعد
قالي الموضوع انتهى وانا ابوك والحين انا اكلمك كلمني زين لاتقولين ماسويت شي
توني انا جاي شلون ماسويت شي ماخذين رقم اللوحه ولاهمب كاذبين عليك بشي
قلت له صراحه بقولك السالفه
قالي قل يله واخلص
قلت له السالفه من طقطق لسلام عليكم وقلت له بس تكفى بدون تعصيب ولا فرش
قام ضحك وقالي الموضوع خلص الحين والرجال دفعنا له كل شي دفعه وراضيناه بعد
وتنازل ودفعنا غرامه وكل شي منتهي .. لكن اياني وياك تتعودها ثاني مره لا صار لك
شي تعال وقل صار لي كذا علشان ندبر الامور من بدري.. قلت له سم ان شاء الله
وقمت اطامر من الفرحه راح هم من على قلبي ست شهور وانا اهوجس.

عاد الى ابي اقوله يمكن انا كان عمري وقتها صغير وهذا ما يبرر غلطي في ذاك
الوقت لكني كنت افكر بما ان الرجال ما جاه شي اضرار بسلامته هو الى لف علي
ولكن فعلاً حياه الناس مهيب لعبه وانا بس اضرار الى سويته مادي على السياره فقط
وجاني هم ووجع قلب لين ما انتهى الموضوع .. فاستغرب من الى يدهسون ناس تقطع
الطريق او غيره ويهربون كيف تهون عليهم وكيف يعيشون هل هم بدون ضمير ؟؟؟

مع تحياتي
اخوكم من الذاكرة

مصدر الموضوع : شخصي



ريماااااااااس       285


بصراحة جالسة أنا ونسرين أختي على هذى
الصفحة وهاتك ضحك
أش هذا يا من الذاكرة والله عليك حركات
بس لو أرفقت صورة لك وأنت في حالة الخوف
لكن الموضوع جناااااااان علشان نفسي اشوف شكل إنسان وهو خايف هههههههه
الله يخلي لك الوالد والله انة حليم معاك لو واحد غيرة
لكان انت الحين في خبر كاااان
وعندما يموت الضمير أخي الكريم يفعل المرء أي شيء
وهولاء ضميرهم قد دفن فلا يبالوا بمايحدث للأخرين من أفعالهم
شكراً أخي من الذاكرة على نثر رذاذ الأبتسامة علينا في موضوعك


Re: رد على التعليق :

هههههههههههههه
جالسين تضحكون علي هاه ؟؟
ياويلكم مني ترى .. بس يله مستقويه باختك
متوزيه وراها .. ؟؟
نسرين وخري شوي لو سمحتي خل اتفاهم مع ذا المفعوصه
ههههههه
الله يعطيكم العافيه .. يسعدني حضوركم
بصراحه هي تجارب في الحياة جيد ان الانسان يتعلم منها
وجيد ان المواضيع يكون لنا في نهايتها بصمه ..
فالهدف من الموضوع نزرع ابتسامه من خلال الموقف الى حصل .. ومنها نتفكر في حياة الناس .. ونقد اللامبالاه
لكم مني اطيب تحيه


أضف تعليقك على الموضوع


الأسم
البريد


جميع الحقوق محفوظة© مــن الـــذاكرهـ  - خلاصة المقالات