مدونة من الذاكرة © From-Memory

مدونة من الذاكرة © From-Memory
     عُـلبة ألــوان البطاقات  الرئيسية


  :: الصفحة الأولى ::
  
  عُـلبة ألــوان
  
  شمعـه مضيئــه
  
  كشكـول أيامي
  
  أحاديث نفـسـ
  
  لوحات ناطقة
  
  صـورة مقـلوبـة
  
  يوميات مدرس
  
  تـقـنـي
  
  البطاقات

 

::: بحث :::



::: حكمة :::

إذا تكلمت بالكلمة ملكتك وإذا لم تتكلم بها ملكتها


::: مواقع  :::

 

من الذكرة


::: راسلنا :::

الاسم :

البريد الإلكتروني :

موضوع الرسالة :

نص الرسالة :


::: إحصائية المدونة :::

 

  عدد الزيارات الكلية : 375122
   عدد المقالات المنشورة : 229
   عدد الأقسام المفتوحة :8


 
 

من الذاكرة

2/2/1427

دعوة لقراءة المقال

نسخة لطباعة المقال


الحصة الأولى


طبعا بعد ما توجهت للمدرسة وقابلت المدير وتعرفت عليه قالي شرايك تجرب تاخذ حصص اليوم تشوف كيف الوضع بالتاكيد قلت له بكل سرور ..

المهم انه قالي عندك صف سادس الآن رح عطهم حصه , فطبيعي سألته وش أعطيهم ؟؟ فقالي أبد انت شف وش عليهم الآن وأشرح لهم وإذا ماحسيت أنك مستعد سو لهم مراجعه للدرس الماضي وقالي يبغالك تشد عليهم شوي لان فيه كم طالب يعني يبغالهم حزم في هذا الصف .. وراح المدير وتورطت ..

لا ادري وين ذا الصف ولا وش المطلوب ولا وش اسوي .. ما اقتنعت تماماً بسالفه شف وش عليهم واشرح لهم والا راجع لهم .. يعني كاننا بسوق خضره مو بمدرسه تعليمية .. المهم اني توجهت للفصل هذا بعد ماسالت وين سادس وين سادس كني عجوز مضيعه ولدها في ا لسوق .. وصلنا لفصل سادس .. الله وأكبر يالفصل عاد محلق في حوش المدرسة ياعيني ياعيني على التعليم ..

مدرسهم الى كان عندهم يوم شافني وكانه شايف الفرج وجاء لحد عنده اهلا اهلا هلا بالاستاذ .... حياك الله بتعطيهم درس ؟ قلت له ا يه نعم سالته وش عليهم الآن ؟ قالي مطالعة قلت طيب وش الطريقه المتبعه معاهم ؟؟؟

فقالي اي شي تشوفه يناسبك وانا طريقتي كذا وكذا وكذا .. فرجع المدرس دخل على الطلاب وقالهم هذا استاذكم الى بيدرسكم المادة بدالي اليوم وياويل الى يسوي ازعاج .. والتفت علي وقالي يا استاذ الى يشاغب عطني خبر بس اوريك فيه .. قلت فيه نفسي ونعم المعلم ونعم الطلاب ..

بدأت سلمت عليهم كيف حالكم ياشباب ان شاء الله طيبين
انا بدرسكم اليوم مادة المطالعه يله وين وصلتو ؟

قالو الدرس الفلاني يا استاذ قلت يله لكم خمس دقايق قراءة سريه > طبعا حسب تعليمات المعلم مع اني ماني مقتنع بهذى ا لطريقه .. بس يله سريه سريه وعطيتهم خمس دقايق وبعدها سالتهم هاه خلصتو ؟؟؟

وطبعا في  فتره القراءة وفيه كم طالب يتوشوشون ويضحكون واطالع فيهم ويسكتون والى يرفع راسه يطالع فيك جديد تعرفون شي لازم يبحلقون فيك وكل من رفع راسه وجت عيني بعينه نزل راسه والى يسوي نفسه يكح والى والى والى حكايات .. المهم

هاه خلصتو ياشباب ؟؟
كلهم بصوت واحد ايه يا استاذ .. قلت لهم يله تبعوا معي .. في الكتاب
وبدأت اقراء لهم وكان فيه طالب يضحك .. وسويت نفسي اول مره ماشفته ولكنه ما انتهت فتره ضحكه جالس يلعب ويضحك .. فوقفت قراءة وقلت له خلاص ياولد .. ورجعت اكمل قراءة وبرضو الطالب مصمم يضحك .. فوقفت قراءة مرة ثانيه وقلت له قم اطلع برا .. فقالي يا استاذ وما عطيته فرصه قم اطلعععع برااااااا .. قلت ادب وقلت حيا ما نبغى هنا .. وقت الدرس خلك في كتابك واستمع .. واذا فيه شي يضحك ضحكنا معك والا اطلعك برا .. فسكت وتغير لون وجهه وسكت الفصل كله .. طبعا انا في داخلي حاس برحمه تجاهه ولا احب مثل هذى الاساليب واحس بان الطلاب في هذى اللحظه اخذو انطباع عني باني شخص شديد وسيئ والله يعينهم علي .. انتهيت من قراءة الدرس لهم .. ثم بديت اخليهم يقراون طالب طالب واوجه الاخطاء .. والمشكله انا مو مختص يعني من الممكن اني اقع انا شخصيا في اخطاء في القراءة وهذا ناتج طبيعي لعدم تخصصي بالمقرر .. المهم وبعد ما انتهوا كلهم من القراءة سالتهم هل فيه احد معيد في الفصل ؟ فاجاوبوني بانه مافيه احد معيد مع ان عندي معلومه بانه في ثلاث طلاب كبار في السن معيدين اكثر من سنه لكن في سنوات سابقه يعني كلهم في سادس جدد يعتبرون .. عديت الموضوع ولا حبيت احرجهم مع ان اشكالهم واضحه .. بدات افتح المجال للطلاب يتكلمون بداو يسالوني وش اسمك يا استاذ ؟؟؟؟؟
فقلت لهم اسمي فلان الفلاني ..
فقام طالب سالني وش ترجع يا استاذ ؟؟؟
فقلت لهم انا من القبيله الفلانيه
فقالو ونعم ونعم يا استاذ
وقالو ماتبي تتعرف علينا ؟ فقلت لهم لا بعدين اتعرف عليكم
فالحو الا يا استاذ تكفى تعرف علينا
قلت لهم يله نبدا من هنا وبالدور وبدون ازعاج
وقامو يعرفون عن نفسهم وبداو يسالون عن الجامعه
وعن طريقه الدراسه فيها وبديت اجاوبهم وحسيت بارتياح في داخلهم زائد بعض الاحاسيس الشريره عند بعضهم في اعتقادهم أن هلمدرس شكله حبيب بنجننه .. طبعا هم مايدرون وش تخصصي الاساسي والا كان علوم ههههه
المهم قبل نهايه الحصه .. قلت لهم شوفو ياشباب اللعب له وقت والدرس له وقت وقت الدرس ما بي احد يتكلم ولا يلعب ولا يضحك ونخلص الدرس وباقي الحصه اتركها لكم تسولفون وتسالون وتسوون الى تبون بدون ازعاج .. وان شاء الله كلكم بتنجحون وتاخذون درجات كامله عندي .. لكن الى بيقل ادبه صدقوني له تصرف ثاني عندي ..

رن الجرس معلن انتهاء الحصه .. وقام الطلاب يترجوني اجيهم في مواد ثانيه
الى يبغاني اجي بدال مدرس الرياضيات والى بدال مدرس العلوم والى بدال مدرس القرآن .. وياسلام سلم بس .. لكني قلت لهم ابشوف ومايصير الا الخير

وطلعت وخليتهم ..
طلعت وانا محتار بين امرين امر شخصي وامر خاص بالمدرسه
المدرسه تطلب منك الحزم ورفع الصوت واصدار العقوبات على الطلاب
وشخصي يتعلق بشخصيتي اني ارفض كل هذى ا لاساليب ومؤمن باني قادر على حل جميع المشكلات وضبط الفصل باسلوبي الخاص .. 

 اكمل لكم الى صار في فصل خامس (ب) ههه الحصه الثانيه لي في موضوع ثاني

مصدر الموضوع : شخصي



لين       13


السلام عليكم أخوي من الذاكرة عاد الزمان للخلف وكأني من جديد في حصة القراءة والدقائق الأولى قراءة سرية ماختلفت الطريقة كثير 000 ربما كان الهدف تمهيد الدرس في اذهان التلاميذ والتركيز على افكاره وان التلميذ يعرف المفردات الي تكون صعبة عليه احيان ضحك الطلاب يكون على بعضهم الله اعلم احد يدوس رجله تحت الماصة وبالتأكيد ماحد دغدغه في الحصة ممكن لو سألته بعدها بفترة وبشكل ودي على جنب انه يقولك حتى تعلم بالضبط الدافع لهذا السلوك إنك قادر بالتأكيد على تطبيق قناعاتك التربوية وضبط الفصل بالشكل الذي يريحك ويريح ايضا التلاميذ وماتصير الغالبية ضحية لمجموعة مشاكسة اخيرا مهنة التعليم أصعب من غيرها لانا نتعامل مع عقول وطباع وأمزجة متنوعة وفقك الله أخي


Re: رد على التعليق :

الله يسلمك اختي لين حقيقه ماعندي مشكله في الاسلوب ولا في الطلاب وبالعكس هذا عمر حساس ويحتاج لتحمل .. وكتابتي فقط لعرض تجارب جديده بالنسبه لي ولا ادعي العلم بالتعليم ولكني سوف احاول ان اكون اميين بقدر المستطاع في القيام بهذه المسؤوليه التي لا علاقه لي بها .. اما عن ضحكهم وعن العاقب لا اعتقد باني سوف اخذ الجميع بذنب واحد ولا اعتقد باني سوف استخدم اسلوب العقاب البدني نهائياً ولكني سوف استخدم بعض الاساليب النفسيه التي سيكون لها اثر في نفس الطالب مما يساعد في دفعه للتحسن بسلوكه .. لك تحياتي


لون المطر       112


يسعد مساك
اعرف بأني طولت بالغيبه بس يا أنا جايبه معي غنايم
مثل ما يقولون >>>>>>> ما عندها الا الفقر
عموماسعدت جدا بعودتي لمكان اشتقت له جدا جدا
واللي اقوله ان هذي مو دراسه يا خوي هذي كنكم
تلعبون مدرسه الله يعينك بس الحمد لله الله ما خيب ظنك
هذا انت جبت الشهادة وحتبأ دكتور أد الدنيا ان شاء
الله تعالى
على فكرة ما نادوك يا استاد يا استاد !!!!!!
تحياتي


Re: رد على التعليق :

@_@ لالا ما صدق عيوني
اقول لحظه اغسل عيوني يمكني مخبط والا شي ..
اها الا والله لون المطر بلحمها وشحمها ههههه
ايه والله طولتي الغيبه ابو العجز الى فيك والله
بس اشوى انها جت بغنايم ..
الله يبارك فيك ويسمع منك وعقبال الى في بالي يصيرون دكاتره ..
خليها على الله والله حوسه ذا المدرسه رايحين فيها ..
ابكمل كتابه عنهم في حصص كثيره ماكتبت عنها ..
قلت اخليها تخزين كلها تحتاج تنقيه وتصفيه
بعدين لو سمحتي انتبهى احد يزعل دبنا ترى ياويله ..
ياحياك ربي والله ..
شاكر لك هلطله الحلوه .. ولا تحرمينا وجودك


كـــوين       321


هــلا بالغـــلا ..
اول شي الف مبرووكـ ع الوظيفه
و الله يكون بعــونكـ ان شاء الله ..
و احــمد ربكـ عطــوكـ سادس و خامس
لو عطوكـ اول و ثاني تطلع من طوركـ
صعب تضبطهم ..
استمتعـــت و انا اقرى يومياتكـ
فــوق ما تتصـــور ..
مو عارفه اعلق اكثر ..
بس كل الي اقووله ..
ربيـ يوفقكـ ان شــاء الله
و عقــبال ما تشتغــل في مكــان
ينـــاســب تخصصــكـ ..
تحـياتيـ لكـ =)
كـــــوين ..

أضف تعليقك على الموضوع


الأسم
البريد


جميع الحقوق محفوظة© مــن الـــذاكرهـ  - خلاصة المقالات