مدونة من الذاكرة © From-Memory

مدونة من الذاكرة © From-Memory
     عُـلبة ألــوان البطاقات  الرئيسية


  :: الصفحة الأولى ::
  
  عُـلبة ألــوان
  
  شمعـه مضيئــه
  
  كشكـول أيامي
  
  أحاديث نفـسـ
  
  لوحات ناطقة
  
  صـورة مقـلوبـة
  
  يوميات مدرس
  
  تـقـنـي
  
  البطاقات

 

::: بحث :::



::: حكمة :::

قطّاع الطرق يطلبون منك إما النقود وإما الحياة ، أما المرأة فتطلب الأمرين


::: مواقع  :::

 

من الذكرة


::: راسلنا :::

الاسم :

البريد الإلكتروني :

موضوع الرسالة :

نص الرسالة :


::: إحصائية المدونة :::

 

  عدد الزيارات الكلية : 373997
   عدد المقالات المنشورة : 229
   عدد الأقسام المفتوحة :8


 
 

من الذاكرة

23/11/1427

دعوة لقراءة المقال

نسخة لطباعة المقال


أبي عيال ...


-

صراحة بتكلم عن فكرة مرت في راسي قبل فترة ..
ورحت في خيالي معاها شوي وطلعت ببعض الاستنتاجات الخاصة ..
وبحكيها لكم بأسلوبي العادي.. على شكل قصة , لكن لا تشرهون ..

خالد شاب طموح موظف في بنك ويعني ممشي حاله..
متزوج من سارة بنت خالته عن قصة حب ويعشقها ويموت فيها وسارة تبادله نفس الشعور .. مر على زواجهم أكثر من ثلاث سنوات حياتهم من أسعد مايكون لكن فيه شي مخفي في حياتهم منغص عليهم ... لهم ثلاث سنين ما بين لهم حمل .. كل منهم يفكر ياترى المشكله وين ؟؟!!

أحداث ..
-    سارة أنا .. أنا .. ودي أكلمك في موضوع لكني متردد خايف تفهميني غلط وتزعلين مني وأنتي عارفه أني مقوى زعلك !!
-         خالد وش فيك قول حبيبي أنت تدري أني ما أزعل منك .. كيف أزعل منك وأنت حياتي كلها؟!
-         يوه ياربي لا تحرمني منها .. بذمتك سارة انلام فيك ؟؟ !!
-         خالد بس عاد ياشينك لازم تفشلني كذا دايم ؟؟
-         وهـ وهـ .. بس
-         أقول خلود أعقل وقول وشو الموضوع إلى ودك تكلمني فيه ؟
-         وش أقول لك ياسارة .. امممممممممممم تدرين كم لنا متزوجين ؟؟ ..
-         ايه فهمت وش تبي تقول .. قصدك الحمل صح ؟؟؟
-    ايه ياسارة انا فكرت لا يكون فيه مشكله, ترى أنا أحبك لا تفكرين بس قلت لو كان فيه مشكله نحاول نعالجها والا ترى انا مايهمني هلموضوع ..
-         صدقني خالد لا تلعب على نفسك لو مايهمك ماجلست محتار وتفكر فيه .. قلب وجه سارة وسكتت بعد هلكلام.
-    سارة افهميني الله يخليك صدقيني مايهمني هلموضوع انا احبك ومايهمني ان كان فيه حمل والا لا .. وبعدين انتي تعالي هنا وش فيك كتمتي علي الحين الى يسمعك يقول ان المشكله منك ؟!!
-         ايه اكيد مني اجل من مين ؟
-         ليش هو على كيفك ؟؟ وش يدريك مو يمكنها مني أنا ؟؟
-    علشان كذا انا قلت اقولك نروح ونكشف ونشوف وش السالفه .. ويمكن ترى يكون الوضع طبيعي بس للان ربي ماكتب .. ويمكن يكون بس محتاجين حبوب او نصائح معينه .. لا تتشائمين الله يخليك والا تراني بقفل الموضوع ولا عاد اكلمك فيه ثاني مره ..
-         لالالا .. خلاص طيب انت وش رايك يعني ؟!!
-         انا رايي ياسارة اننا نروح لطبيب ونخليه يكشف ونشوف .. هاه وش قلتي ؟!
-         اممممممممم لحظات تفكر سارة .. ايه طيب ليش لا؟ نروح .. بس انت تعرف طبيب كويس ؟؟
-         والله انا ماعرف .. لكن بسال عن طبيب يكون كويس في هذى المسائل ونروح له .. هاه خلاص متفقين ؟
-         ايه متفقين خلاص اذا لقيت الطبيب علمني ناخذ موعد ونروح ..
ظل خالد يسال ويدور .. وظلت سارة تفكر وتفكر .. ليش خالد بدا يسال ويهتم لموضوع العيال .. لنا ثلاث سنين عمره ماجاب لي طاري .. بدت تتخوف وتاخذها الافكار والظنون .. وتعبت حالتها النفسية وماصارت تشتهي الاكل ولا الضحك زي قبل .. مرت ايام وايام .. وفي يوم جاء خالد فرحان يبشرها بصوت عالي ..
-    سارة سارة .. ابشرك لقيت طبيب فللللللللللللللللته في هلموضوع .. لا وازيدك من الشعر بيت طبيب عالمي جاي زيارة لاحد المستشفيات هنا عندنا قالي عنه واحد من الزملاء وطرت اخذت موعد عنده ..
-    صحيح ؟ طيب كويس بكل برود طلعت العبارات من سارة .. الشي الى جعل خالد يتنح شوي يفكر هل هو قال شي غلط ؟؟ حس انها مافرحت معه بالخبر؟؟ غريبه وش السالفه ؟
-         سارة وش فيك ؟؟ كنك مو مهتمه ؟؟
-         لا من قال بالعكس انا مهتمه كثير وفرحانه بعد .. بس اني مشغول بالي شوي ماعليك خالد لاتشغل بالك ..
-         سارة لا تلعبين علي انا اعرفك انتي متضايقه صح ؟؟؟ ماودك ؟
-         لا من قال عادي
-         سارة لا تكذبين علي انتي ماودك نروح صح ؟ خايفه من النتايج ؟؟
-         لا عادي حتى لو كانت النتايج سلبيه انت حر تقدر تتزوج وتجيب عيال ياخالد
-    يؤ يؤ ؟؟؟؟؟؟؟؟؟؟؟؟؟ سارة وش هلكلام ؟؟؟؟؟؟؟ انا اتزوج عليك ؟؟؟ من الى قال لك اني ابي عيال من غيرك ؟؟؟؟؟؟ انا ابيك انتي انتي زوجتي وامي وعيالي والدنيا كلها مابي بعدك شي .. صحيح انا ما قدر انكر رغبتي في انه يكون لنا عيال نربيهم سوى .. لكن مو على حسابك ؟؟ وبعدين انتي الله يهديك بس وراك خايفه ومستعجله الاحداث ترى يمكن مافينا شي لا فيك ولا فيني .. ويمكن فيني انا مو فيك .. وقتها انتى الى ... وسكت خالد وامتلت عينه بالدمع وسارة تطالع فيه وعيونها غرقانه بالدمع ..
-         خالد وش انا الى ؟؟؟ وش تبي تقول انت ؟؟؟
-    سارة لو كان العيب مني اكيد انتي نفسك في العيال واذا ماقدرت احقق لك هلامنيه ماقدر احرمك منها ... تقدرين تختارين الطريق الى بيريحك .. ويبكي خالد ويقول والعبرة تخنقه .. انا احبك ياسارة .. وطلع مسرع من الغرفة وسارة تلحقه خالد تعال .. تعال ياخالد .. وهو يسرع بخطواته ومعطيها ظهره مايبها تشوف وجهه والدموع ..  ترك البيت .. وركب السيارة وجلس يلف في الشوارع .. يفكر .. ويفكر .. حس أنه ظلم سارة .. حس بأحساسها لو كان المشكله منها .. حس بالالم الى كانت تعيشه كل ما فتح معاها الموضوع وهي تتجرع الالم وساكته من كلامه .. حس ان هي ودها بالاولاد ولكنها ساكته مخفيه احساسها كله علشان ما تجرحه بالكلام .. 
-    خالد يكلم نفسه بصوت عالي في السيارة .. انا اناني ياسارة .. اناني .. ليش سويت معاك كذا ؟؟ ليش اذيتك ؟؟  وبكل انكسار انا ماستاهلك ياسارة ماستاهلك ... وقرر في هذى اللحظه انه يرجع البيت ويتسامح من سارة ..
-    لما وصل خالد البيت ودخل لقاء سارة في الصالة جالسة على اعصابها تنتظره كانت تتصل على جواله لكنه مقفله ماتت من الخوف عليه .. او ماشافته قامت من مكانها خااااااااااااااااااالد انت وينك وين رحت ليش سويت كذا حرام عليك .. تراني متحمل .. خالد سو الى تبي فيني .. تزوج علي الى تبي بس لا تخليني خالد لا تخليني ... خالد يركض على سارة ويضمها على صدرك بقوة بدون شعور منه ... سارة صدقيني مايهمني .. سامحيني انا اسف .. سارة انتي تدرين كم لنا متزوجين عمري مافكرت في هذا الموضوع .. بس تعبت كل مارحت لاهلي والناس واصدقائي يسالوني هاه بشر جاك عيال اقولهم لا تو مافيه شي .. لدرجه اني صرت انحرج كثير .. وصارو يقولون لي تزوج ثانيه .. سارة انا مابي غيرك .. ومابي عيال .. انتي عيالي انتي دنيتي صدقيني يا سارة انتي عيالي .. انتي احلى زوجه واحلى طفل بحياتي .. مابي غيره ولا ابي له بديل ...
-    سارة بصوت متقطع تبكي بنحيب يخرج من وسط صدرها بالم ... خالد انا مقدر احرمك من العيال .. من حقك يكون لك عيال زي باقي اخوانك واصدقائك .. خالد عطني فرصه بس .. نروح الطبيب ولو كان العيب مني خالد وتنفجر بكاء .. وخالد يحاول يهديها .. سارة لا تكملين اسكتي .. لا ياخالد منيب ساكته خلني اقول الى بخاطري الله يخليك ياخالد .. اذا كان العيب مني وتنفجر بكاء ويحاول يهديها خالد لكن مافيه فايده وترجع تكرر نفس الكلمات خالد اذا كان العيب مني ... طلقني وتزوج علي وجب عيال .. خالد ابيك تنساني وتعيش حياتك انا ما اقدر احقق لك امنياتك ولا امنيات امك واهلك في العيال .. انتييي وش تقولين ؟؟؟؟ من قالك اني ابي عيال ؟؟ من قالك ان فيه غيرك امنيات بحياتي .. تكفين لاتكملين كلامك خلاص يكفي علي ترى انهارت اعصابي مقدر اتحمل هلكلام تفهمين ؟؟ ما تحمله خلاص ..
-    قام خالد حضن سارة وهي تبكي وهو يبكي معاها لين نامت سارة بحضنه وهو جالس يفكر كيف يشيل هلافكار من راس ساره كيف يخليها ترتاح وكيف يوصل لها انها اغلى من حياته مايبي شي بهذى الدنيا غيرها .. جلس يفكر ويفكر لحد ماغلب عليه النوم ونام وساره نايمه فوق حضنه .. وكل ماتحركت سارة فز خالد من نومه ورجع يحضنها على صدره مسكين خالد كان يخاف تروح سارة منه ... وفي اليوم الثاني قام خالد وطلع لعمله ولما رجع مر بيت امه وجلس يتقهوى معاها ووجه شاحب وقالب لونه امه تساله شفيك ياوليدي عسى ماشر ورى لونك متغير ؟؟ عسى مهيب مزعلتك مقصوفه الرقبه ؟؟ متهاوش انت وياها ؟؟؟ قام خالد وقف يمه الله يرحم والديك لا تتكلمين على سارة ماعليكم منها .. انا احبها ومابي احد يتكلم عنها ... وش تحب فيها وانا امك ؟؟؟ حتى عيال ماجابت لك للحين ... يمه ارجوك خلاص مابي اسمع كلام زيادة .. من قالك اني ابي عيال .. سارة هي زوجتي وعيالي ودنيتي كلها مابي عيال من غيرها وان كان ربي ماكتب لي .. فانا مابيهم خلاص ولا تفتحين هلسالفه مره ثانيه كانك تبين تشوفين وجهي .. وسكت بعدها يتقهوى مجاملة لأمه وهو ساكت وعلامات الضيقه بوجهه بدت واضحه .. قام بعدها وراح يم سارة .. لقاها جالسه تنتظره المسكينه على اعصابها تحبه ولا ودها تزعله وفي نفس الوقت ماودها تخسره ونفسها تحقق حلمها وحلمه في العيال .. لكن للاسف ماصار شي من هذا كله .. دخل خالد اهلين ساره شخبارك اشتقت لك وحشتيني ياغاليه ياحلى زوجه بالدنيا يادلوعتي ياحبيبتي ياروحي ياعمري وجاء وجلس جنبها وساره تطالع فيه وعيوني تمتلي دمع .. ليه يداري خاطرها وهي مو قادره تحقق له رغبته .. مسك خالد راسها وقبله وقالها لاتفكرين ولا تشيلين هم تراك اغلى شي بحياتي ومستحيل افطر فيك .. وصدقيني انت بالنسبه لي كل شي مابي بعد شي .. ومساله العيال ان ربي كتبهم فخير وبركه وان ما كتبهم لو نطير ونوقع ماهوب جاينا شي انا مؤمن ياسارة بهلشي .. خليك مؤمنه فيه .. قامت سارة حطت راسها على صدره وضمته ماهي مصدقه من الفرحه حسبت بصدق بكلامه حست انه مايداريها بس الا يحبها ويبيها .. فقالها يله اسمعي اليوم انا عازمك تجهزي بس بطلع مشوار وارجع ونطلع امشيك واعشيك بدلعك اليوم خلاص ؟ قالت خلاص ابشر حبيبي .. وكانت ليله ولا اروع في ذاك اليوم ضحك وسوالف وحب .. لوقت متاخر من الليل ورجعو البيت وسمرو مع بعضهم خالد ناوي مايرح الدوام بكره بيجلس مع سارة .. يبي ينسيها هلحزن الى ارتسم على ملامحها بسببه .. ومر اليوم والثاني وهدت حياتهم ورجعت طبيعيه بس يتخللها بعض الهواجيس والافكار .. ومر شهر .. واسبوع .. واسبوعين .. وتعبت سارة .. تتصل على خالد في العمل خالد تعبانه مدري وش فيني .. سارة وش فيك بسم الله عليك ؟؟؟ مدري ياخالد فيه الم بجسمي وصداع ذبحني ماني قادره بتصل على اخوي يجي يوديني ؟؟ اخوك لا والله ماتتصلين عليه انا الى بجي اوديك يله يله باي ... وينطلق خالد للبيت بياخذ سارة وعلى المستشفى فورا كان يسوق بشكل جنوني وكان الحاله اكثر من طارئه اكيد هو من حب سارة ... في المستشفى الطبيب شو شو شو فيه سلامات سارة مدري يادكتور صابني الم ماعرف ليش آآآيي دكتور تكفى وش اه فيني ... خير خير يا اختي لحزاات بس بنئيس الك الظغط والحراره .. بدا الدكتور يكشف .. اممممم بدنا ناخذ اليك تحاليل لاجل نتاكد .. انصفع وجه خالد وحس ان الوضع فيه شي وقام يتصبب العرق من جبينه لا يجي سارة شي .. وعلى قسم التحاليل وجالس ينتظر النتايجه اخذها وعلى غرفه الطبيب هاه طبيب تراك وقعت قلبي علمني وش فيها سارة ... شو ياخيي وحد الله شو هاذ .. ان شاء الله خير بدك تجلس هون ترتاح اشوي لحد مانشوف شو القصه .. لا يادكتور علمني انت شاك بشي وشو علمني بسرعه تكفى لا تخليني على اعصابي ... ياخي شوبنا شو انتا ماعندك اولاد من اببل هيك ؟؟ لا والله يادكتور وش دخل العيال الحين لا تنرفزني علمني سارة فيها شي ؟؟ لك شو شو مابدك ولاد انتا ؟؟ هاه وش تقول انت يادكتور ولاد شو ؟؟ مافهمت وش قصدك ؟؟ بئول بدك ولاد والا لا ؟؟ الا اكيد احد مايبي عيال يادكتور ؟؟ طيب اها خلص مابتعمل هيصه هون .. الف مبروك المدام حامل .. هاه انت صادق يادكتور ؟؟؟؟؟؟؟ أي شو بمزح معك انا ؟؟ سارة سارة انتي حامل ؟؟؟ ماقدر خالد يتماسك من فرحه الخبر وطاح مغمى عليه .. تماسكه الدكتور وحاول يصحيه وجلسوه ولما فاق واول مافتحت عيونه وين سارة ؟؟؟ وسارة قدامه مرتعبه عليه خايفه .. وفرحانه وماهي عارفه وش تسوي ودها تطير من الفرحه يكفي كلمه انها حامل .. بددت كل المخاوف بداخلها وكل الشكوك .. خلاص بتحقق حلمها وحلم خالد .. قام خالد جيبو لي عربيه .. ليش شو فيه مو ءادر تمشي ؟؟ لالا سارة مابيها تمشي .. جيبو لي عربيه بسرعه والا شلتها مستحيل تمشي خلاص ابيها ترتاح ... تغيرت مشاعرهم الحزينه لفرح فجأة .. ورجعو لبيتهم وعاشو حياتهم خالد مهتم بسارة ومطفشها في عيشتها لا تقوم ولا تتحرك ولا تسوي أي شي .. وحالف عليها ان تحركت انه بيجلدها صار هو الى يطبخ وينظف وقايم بشغله وشغل البيت مايبي منها شي الا انها ترتاح واقف على طلباتها لحد ما جاءت لحظه الصفر .. يوم ولاده سارة .. وجابت بنت وسموها (أمل) واستمرت الحياة حلوه بينهم وانتهى كابوس العقم وعدم الانجاب..

طبعا كثير سمعنا قصص عن قضيه عدم القدره على الانجاب و و و .. ويمكن البعض عايش مثل هذى الاحداث بطريقه او باخرى ويمكن مر عليه حوادث مماثله له عاشها هو شخصيا او احد من افراد اسرته القريبين او حتى اسرته بشكل عام او معارفه .. المهم ان القضيه هذى ماهي شي عجيب او جديد وشي ملموس والكل قد سمع وشاف شي من هذا القبيل ... لكن نرجع للأساس والهدف من سرد قصه .. هو ان الايمان بالله سبحانه هو أهم أمر يجب التمسك به .. ومساله القضاء والقدر .. الانجاب والاولاد هي زينه في الحياة الدنيا كما ذكر الله عز وجل في كتابه .. والجميع يرغب في أن يرزق بهم .. ولكن لا يقف الامر عائق أمام الزوجين ولا يجب أن يكون هناك ضروره ملحة للانفصال لاجل عدم القدرة على الانجاب فالحب والالفه بين الزوجين باقيه وكافيه لضمان حياه هنيئه .. لا مانع من ان يتخلل ذلك رغبه في الانجاب من كل الطرفين .. بعض الرجال قد يتنازل مقابل البقاء مع زوجته التي احب .. والبعض قد يرى مسلك أخرى يضمن فيه تحقيق كلتا الرغبتين فقد يتزوج من اجل الانجاب ويحافظ ايضا على زوجته السابقه التي احب .. لكن .. ثق ثقه تامه بان الله عز وجل هو اخبر بعباده وربما يكون في تاخير مساله الانجاب او عدمها خير للانسان فلا تيئس من رحمة الله .. فهو قادر على كل شي .. مقابل العمل بالاسباب .. ولكن حافظ على حياتك من الاهتزاز .. اتمنى لجميع النساء والرجال خلفه مباركه .. وقدوم سعد عليهم جميعاً ..

لكم تحياتي
من الذااااااااكرة

مصدر الموضوع : شخصي



المحرومة من كلمة ماما       301


السلام عليكم ورحمة الله وبركاته
الأستاذ من الذاكرة
أولاً أحب أن أحيك على طرحك الرائع وعلى اختيار الموضوع فلقد شد انتبهي
قد سردت قصة تحكي واقع أعشيه أنا و غيري من الأسر لقد أتيت على الجرح وجعلت ينزف قرأتها أكثر من مرة وفي كل مرة جعلتني أشعر بالرغبة بالبكاء0 أصعب شيء على المرء أن يكون لدية أمنية يعمل قصار جهده لكي يحققها ولكن يعلم هو في داخله أن كل المحاولات فاشلة في تحقيق الأمنية لقد تحولت أمنيتي أستاذي من أن أسمع كلمة ماما إلى أن أتمنى ظفر طفل أو طفل معاق المهم طفل أسعد بة وأسعد به أعظم قلب ووأعظم إنسان في حياتي ذلك الأنسان الذي لو تركت لى الفرصة في الحديث عنة لكتبت عنة الصفحات والصفحات التي لن ولن أوفية حقة هو زوجي أعذرني أن خرجت قليلاً عن موضوعك0
أنني أعيش حياة سعيدة وطبيعة ولله الحمد ولكن 000 هناك من ينغص علينا حياتنا وسعادتنا وهمهم هو أن يرونا تعساء
وتناسوا بأن الإنجاب من الله عزوجل وهي نعمة من نعم الله قد يمنحها الله لغيرنا ويحرم لأخرى منها كل الذي نريده هو أن أولئك الأشباح الذين يطاردونا في كل مكان هدفهم رسم الحزن والدمعة علي حياتنا أن يتخيلوا أنفسهم مكانا ماذا سيفعلون وماهي ردة فعلهم 0
أكرر شكري لك على هذا الطرح الذي لامس شيء في وجداني 0


Re: رد على التعليق :

وعليكم السلام ورحمة الله وبركاته
اولاً اختي الكريمه .. اتمنى ان تكونين متفائله اكثر من ذلك في الحياة ...
والحمد لله على كل حال .. فالله قادر سبحانه فيقول كن فيكون .. لا تيئسي من رحمه الله
تقولين الآن انك تتمنين لو طفل معاق .. حقيقه لا اتمنى ذلك لكي .. فمن لديهم اطفال معاقين يبحثون عن حل للخلاص من هؤلاء المساكين ..
وكثيرا مانجد الاهل وقد زجو باطفالهم في مراكز التاهيل وغيرها .. ولم يعد يعترفوا بوجودهم
للاسف هذا واقع .. بل اتمنى لك انجاب طفل سليم معافي يملأ الدنيا من حولك سرور وبهجه
مساله تاخر الانجاب ليست مشكله بحد ذاتها .. طالما كما ذكرتي ان بينك وبين زوجك تلك الالفه والمحبه ..
المشكله لديكم هو من حولكم من الناس ونظراتهم .. مما قد يسبب لك عزله اجتماعيه لذات السبب .. لذا العمل بالاسباب مهم .. والبحث عن علاج ان كان هناك مشكله ..
والايمان بالله عز وجل وبقضائه من اهم الامور التي يجب عليك التمسك بها ..
فاعرف اكثر من حاله والحمد لله نتج لديهم حمل بعد مضي سنوات طويله .. دون سبب يذكر فقط كان ايمانهم بالله اقوى من اي شي .. لا تفقدي الامل ..
ثقي باذن الله انك ستحصلين على ما تتمنين ..
واعملي ان الحاله النفسيه كل ماساءة كل ماكان ذلك ابعد عن تحقيق الكثير من الامور .. فهي تنعكس على باقي مناحي الحياة .. كوني متفائله .. فالله معك .. فمن غير الله نبتغي ؟
وكما اخبرتك ..
عليك بعمل الاسباب فقط .. ورفع الاكف لله عز وجل ..
فهو مستجيب لمن دعاء ..
ومساله التاخر في ذلك .. قد تكون في خير لكم..
اتمنى لك خلفه سعيده .. وتصيرين ارنوبه
وتحملين خمس مرات بس .. وفي كل مره تجيبين خمس توائم ..
اممممممم خمسه × خمسه
بيصير عندك خمسه وعشرين طفل .. وااااو
بتجين تقولين يرحم امك لا عاد تدعي خربت بيت اهلي
ههههههههه
ربي يسعدك ويوفقك ان شاء الله
لك جل تحيه .. وسامحيني ان كان الموضوع اثار شجونك
من الذاكرة


لين       302


السلام عليكم اخوي من الذاكرة قرأت هذه القصة وهي جميلة وطويلة لقد كدت أقفز فوق السطور قفزا حتى اطمئن على النهاية وارى وش يصير في سارة وزوجها وأعجبني ان تنتهي بشكل سعيد وليس مأساوي وقرأت ماكتبته أختنا المحرومة من كلمة ماما وتأثرت بما كتبته وقرأت ماكتبته عدة مرات وإني لأرجوا ان تحتفظ في داخلها بالأمل الذي يبعث في النفس التفاؤل والله خير الرازقين هناك عندي طرح ممكن لايستسيغه البعض لايمكنه يشبع الى حد كبير الحاجة للأمومة ويبعد الى حد ما الشعور بالوحدة انه تبني طفل يتيم كانت عندنا موجهة رائعة ونبيلة تتجه نحو الخمسين من عمرها لاتنجب تبنت طفلتين يتيمتين الحين يدرسوا ابتدائي وكانت طيبة وحنونة معهما ومهتمة بهما لن أزيد اخي الكريم على ماعلقت به على القصة فأنا أتفق معك في تعليقك وأراه كلاما حكيما وشاملا واقتبس من تعليقك جمله اراها أجمل ماأختم به تعليقي هنا ( اتمنى لجميع النساء والرجال خلفه مباركه .. وقدوم سعد عليهم جميعاً ..)


Re: رد على التعليق :

هلا والله وغلا لين
ايه ليش تقفزين لازم اهبل بكم قبل توصلون للنتيجه
وش اسوي عاد نجيس على قوله بعض الناس هههه
النهايات الحمد لله دائما متفائله .. وهي ما يحدث .. لكن نحن للاسف مجتمع يفترض السيئ دائماً ..
وذلك بعذر ان لا ننصدم في الواقع ..
فانا اقول لاتكن فوق العاده ولا اقل من العادة ..
كن متزن .. في مشاعرك تجاه الامور ..
وبما ان توكلنا على الله .. فالامل اقوى ..
فمن اقوى منه سبحانه ؟! فهو قادر بالتاكيد
مساله التبني اختي هي طيبه .. ولكنها لا تشبع الاحساس
هي للتفريغ من جانب واحد فقط .. قد لاتكون متبادله الا في حالات سبحان الله كيف تاتي ..
هناك حاجه الابناء للعاطفه .. وهي من اهم الحاجات التي يمر بها الانسان في مراحل طفولته ..
تلك الحاجه اختي الكريمه .. لا يمكن اشباعها الا من خلال الاسره الحقيقيه .. ولله حكمه في ذلك
وكانت ولا زالت هذه مشكله تعاني منها دور الايتام وغيرها حتى برامج الاسر البديله ..
لله حكمه لا يعلمها الا هو في هذا الامر ..
وفي الختام .. اتمنى لك ايضا خلفه سعيده ومباركه ..
بعدد رمال صحراء الربع الخالي .. علشان نفتك من شرك هههههههه


بنت نجد       303


كدت ان ادمع هنا حين قرات حكاية حبهما ..
حنووون الى ح الثمالة هذا الخالد ..
هل هناك فعلا من هو مثله ؟
اكيد فيه مثله كثير بس مسالة العقم صارت تؤرق الاهل قبل الزوجين ..
تلقاهم يعذبون ولدهم وبنتهم بالاسئلة ..
وتلقاهم ينظرون للبنت نظرة حزن كنها شاكية لهم ..
من الذاكرة اسلوبك الله لايضرك احس ان كلامي كثير ودي
اقوله بس جاني لحظة توقف .. قد تنتهي قريبا!!
لك الف وردة ..


Re: رد على التعليق :

اعتقد ان مثل هذه النماذج موجوده ..
الحرمان في بعض الاحيان ياوخيتي يابنت نجد يولد نوع من الحنان والعاطفه الجياشه ..
لذا فاعتقد ان ذلك ردة فعل مستساغه فيما بينهما ..
حاولت الطرح بطريقه مبسطه .. اعلم اني لا امتلك القدره على الكتابه بمستوى القصه القصيره ..
ولكني اثق باني استطيع ان اوصل بعباراتي البسيطه الى القلب اكثر من غيره من الاساليب ..
وبيني وبينك اكثر ماصار يارق على قولتك ..
ماهي مساله عدم الانجاب بقدر ماهي مساله التخلف الفكري المحيط .. نظرات متعبه جداً ..
قد تجعل البعض يفكر في الاختفاء .. لكي يرتاح منها
ياخي هو احد شكى لكم ؟؟؟

ربك يعين الجميع ..
اذا كان لي الف ورده .. فانا اعطيك منها
999 ورده .. واكتفي بواحده وحضورك الكريم ..
لك مني اطيب تحيه


أنثي المحال       306


أخي من الذاكرة:
كان سردك للقصة جيد خصوصاً استخدامك لبعض المحسنات اللفظية مما جعل القصة تلبس ثوب أسلوب التشويق
قال الله تعالى : ( المال والبنون زينة الحياة الدنيا)
أخي من الذاكرة قد ذكرت في قصتك مثال لواقع يعيشه الكثيرين من الأفراد مجتمعنا وهاهي ألأخت المحرومة من كلمة ماما أكبر دليلاً على ذلك أحب أن أهمس لتلك الأخت بأن الله عزوجل هو مقسم وموزع الأرزاق ولا تعلميني أختي الفاضلة أين الخير فكما يُقال كل تأخيره فيها خيرة وهنا ذكر الاخ من الذاكرة لأبدا تقوية الإيمان بالله عزوجل وهو مطلب وشيء ضروري جداً0 ولا تحكمي أختي الفاضل على محاولاتك العلاجية بأنها فاشلة فبعض المحاولات لا تظهر نتيجتها بسرعة بل تحتاج لوقت لكي تظهر مفعولها 0 وأحب أن أذكر لك بأن الحالة النفسية والاستقرار النفسي والذهني له دور في عملية الإنجاب فلا تجعلي أختي الفاضلة فكرة الإنجاب تسطير على فكرك وعقلك بحيث تكون هي شغلك الشاغل كل الذي اقولة لك أستعين بالله فالله رحيم بعبادة ولا تجعلين فكرة الإنجاب هاجس يدمر حياتك وإشغلى وقتك بعيداً عن تلك الفكرة0 أما بالنسبة للأخت لين لدي مداخلة بسيطة وهي عبارة عن وجهة نظر خاصة وأتمنى أن لا تسبب لك إي إزعاج ذكرتي أختي الفاضلة عن التبني طفل أو طفلة يتيمة هي فكرة رائعة وممتازة وهي تحقق إشباع جزئ لمشاعر الأمومة وتتيحي لطفل اليتيم العيش في جو أسري هذا هو الأثر القريب بالنسبة للطرفين ولكن هناك أثر بعيد وذلك الأثر هو حينما يبلغ ذلك الطفل أو الطفلة سن الرشد فهو بهذه الحالة لا يستطيع أن يستمر مع تلك الأسر بسبب الضوابط وتعاليم ديننا الحنيف فينتج عن ذلك أثر نفسي سئ جداً بالنسبة للطفل وذلك بعد نزعه من الأسرة والأسرة تعاني من ذلك فلا نكون أنانيي بقرارنا في ذلك الأمر الذي يحمل بين طياته ألم نفسي للطفل مستقبلاً
تحيتي لكم

لين       307


سلام سلام سلام انا جيت من ثاني المايك بليز لي مداخلة بسيطة أولا مع أختي العزيزة أنثى المحال حقيقة ماقترحته ليس حل قطعي ولايناسب الجميع انما يناسب البعض ولايمكن ابدا تجاهل الألم الذي قد يصيب هؤلاء الأيتام مستقبلا عندما ينزعون من الأسرة كما لايمكن تجاهل الشعور بالوحدة سأقول لك ماعملته احداهن انها زميلتي تبنت ولد يتيم او لأقل ربته كان رضيع وحتى يكون محرما لها مستقبلا جعلت أختها ترضعه مع ابنها طبعا هي صارت خالته من الرضاعة وصار محرما لها وايضا لديها بنتيت يتيمتين وأرضعتهم أختها أيضا فصار الولد وأخ لهما من الرضاعة انا ادرس وحدة منهم جميلة ذكية أنيقة جدا في الصف الأول الابتدائي وأرى الفخر في وجهها عنما تقول لي ياأبلة انا بنت أبلة--- وتقول لي ياأبلة انا شعري أطول من كذا بس لما أظفره يقصر شوية وأرى السعادة تملأ وجه زميلتي وهي تمسك بيد ابنتها اما بالنسبة لزوجها يستعد حاليا لزواج من أخرى هو يريد ابناء وبنات من صلبه اما هي فهذا الخيار بالنسبة لها رغم صعوبته واحتياجها لموافقة اختها وزوج أختها فقد أراحها الى حد كبير وبالنسبة للمستقبل كيف وضع البنات باللنسبة للرجل الى هم عايشين في كنفه الله أعلم لست أدري حقيقة لم أكن اود ذكر هذه القصة فقد كنت أخطط اجعل منها إن شاء الله مدخل او بداية لرواية جديدة أحاول تجميع خيوطها وشخصياتها وأنت اختي على الرحب والسعة دائما المداخلة الثانية مع أخوي من الذاكرة لكن قبل أن أكمل لازم اناظر في نفسي زين وألمس رأسي حتى أتأكد اني لا احمل قرونا مثل قرون الأشرار لذا فقد قررت مبارزتك بالسيف حدد بس المكان لو قدام بيت اهلك نحتاج جمهور ومشجعين تدري خلاص سامحتك خفت تنهزم على يدي حطمت سيفي وخلعت بزتي العسكرية صافية لبن بالتأكيد أمزح معك بالنسبة لما ذكرته أخوي ذكرت انها لتفريغ من جانب واحد ربما لكن احيانا من جانبين يمكن حسب طبيعة الأشخاص وأخلاقهم ودرجة حنانهم وتفكيرهم ختاما أتمنى لك ايضا أسرة طيبة لايهم ان قل أفرادها أو كثروا المهم يكونون قرة عين لوالديهم

سمـاوية       397


طرح رائعة وذا مضمون اروع

بياض الثلج       476


قصة لا بأس بها

جـارة القمر       498


رائعة جدا

شغب طفلة       505


قصة بدايتهاحزنة ولكن النهاية روعة

أصبحت أم بكرم من الله       531


السلام عليكم ورحمة الله وبركاتة
اليوم قرات الموضوع وقرات ردي على الموضوع وردود الأخوات
وقلت سبحان الله
وأمنت بالله انة في تأخير للحلم حكمة أردها الله وحبيت
أبشركم وأقولكم أني أصبحت امي والحمد لله
وأشكر الاخ من الذاكرة على الموضوع

أضف تعليقك على الموضوع


الأسم
البريد


جميع الحقوق محفوظة© مــن الـــذاكرهـ  - خلاصة المقالات